RANGRUPA| A•CHIK GOLPO

 RANGRUPA

Badiaba song damsao Rangrupa ine derabitgipa me•apa saksa dongachim. Salsao ua an•tangni songoni adita chel•kalgipa songona rona re•angaha. Ua songo adita chuko ringe, ripengskarangmung adita bel•bele roaha. Adita walangahaon Rangrupa bil•cham so•e nate songtangona re•bapilengachim. Ua songtangni mande gopram so•ram biapko re•pakna nangachim. Ua gopram biapona sepangahaon uni natgipa bilchamni wa•alba ka•sne ka•sne dim•elroroangaha. Me•mang saksa uko gronge, biap damsaona rimangaha. Ua biapara namen rongtalachim. Ua biapo banga sigimin manderang tom•dake asongtokengachim.

Rangrupa ua sigimin manderangko u•itokachim. Bang•ani bimungrangkon mingna man•achim. Maina uamanga songtangni manderara ong•tokachim. Nammiting salrango uamang baksan roachim aro kamrangko ka•rimachim. Ua biapona Rangrupa sokbaon, bang•a sigimin manderang a•koltangtangchi re•batokaha, aro Rangrupako dongdule asongtokaha.

Uamang Rangrupako chrokchina ge•etaha. Chakchikna man•jae Rangrupa chrokaha. Unon uamang apsan jakpa doke git ringaha.

"Tim•tim echok timechok

Da•o re•bagipade korongchok,

Tim•timechok timechok, Da•o chrokgipade kodarok"

ine jinma ku•si ong•e jakpa doke wal tong•saona kingking chrokataha. Uamangni ring•a gitan Rangrupara kodarok dakachim. Me•mangrangni dongramranga rongtalbeachim.

Ja•mano uamang Rangrupako noktangchim re•angna man•gen ine aganaha. Watako man•e Rangrupa re•bae nokona sokgija a•pal a•seo tusie pring seng•osa mikrake nokona re'angaha. Ua pilak ong'gimin a'selrangko jikna dena aro ripengskarangna aganaha. Ua nokni manderangna mamung a'sel ong'jaha.

Bang bata manderang, mande-gopram, so'ram aro maiba a'selni gimin songko nokko gale katgimin biaprangko saloba waloba re'pakna kenronga. Gilja noknaba walo re'pakna kengipa manderangba donga. Maina bang'a gilja nokrangona sigimin manderangko ra'nape gilja kachengesa gopronga. Indaka biaprango kal'akako man'ronga ine aganronga. Na'aba kenpaama?