Salsao kawatte mangsa cha•amachini noktang a•kolona an•tangko romrome re•baengachim. Kawatte an•tang be•enko kom•totchengesa romrome re•rongachim. Ua ramao matcha mangsako grongaha. Matcha kawatteko chike cha•na sike uni kom•tote romrommitingo chagope chikaha. Indiba kawatteni bigil rikkap rikkap dake rakbeani gimin uko chikna man•jae watpilaha. Maidake chikode man•gen anga ine on•tisa re•jite chanchiaha. Indiba ia chike cha•ani cholkon u•ijaha.
On•tisa ru•utani jamano, an•tangko chike cha•na man•jae matcha katangaha ine kawatte chanchie aganaha, "Matcha goka! Okglaji bangji, ukkurio bubari", "chong•motan angko chikna skode, bia angni mittalmitingo ka•bako asongjetesa chikpabo, rakgipa janggilchikosa chikpilajokna bano man•pana!"
Ia kawatteni agana kattako knae matcha kusi ong•aha. Atcha, nambejok! An•tangko chike cha•na angni u•ijaengako u•iatjok ine matcha gisiktango chanchiaha. Ua kawatteni kom•tote romromako dikdiksa sengkuaha. Jensako kawatte kom•tote romrome mittaltaiaha, ua bildape ka•bako asongjete chike cha•bebeaha. Untalsa kawatterangko matcharang chike cha•na u•iaha ina.
An•tangni kratchagni ba signi kattarangko aganjojoe jamano kratcha•ani ba sianio ga•akgipa mandekon kawatte ku•dikgila ine agana.
No comments:
Post a Comment