A•bisa A•ba Tua | A•chik Golpo
ABISA A•BA TUA
Walsao Noremung Chire abisa mina a•ba tuengachim. Uamang mikrake dongna manna gita gongminako doke roengachim.
Gong gegong ang•ke grong, gegong,
Bilik kambe gongritong, gegong,
Den•na dako tapritgong, gegong.
Mia Misi rimitak, gegong,
Ang•ke jasi ja•ritak, gegong.
Matcha iako knaenba uamangni turam borang kokkimao dimrim dimrim dake chrokeaha. Nengana gongminako dokgija dontongode, matchara namang-abisako chike cha•na ine borang jang•kiko rikkak rikkak ine maldoangaiachim. Una gongminako dokattaiode, a•china ong•onen matcha chroktaiachim. Uni gimin uamang abisa bodol bodol gongmina doke on•chaen, neng•amung kenamung amchakangpiljaengahachim.
Abitang Nore nogipana aganaha, an•ching matcha-oni jokna maiba chol mingsasikkode dakna nanggen. Indine agane nogipa Chireni gongmina doke on•mitingo an•tang noksik nokbak am•e nioara akkaru mina rongsako nikenba, uko chu•dapo gope, ua minkujana kingking gongminakon bodol bodol doke on•angkuaha. Akkaru minaha ine nikahaoara nokdechol gita a•achi uko galonatenba, rang•san, Aiao angdede! nono, aiao angsade! abi, a•china ga•akangjokke ine chrika daktokaha. Maisa nono chaboda! Haida! abi re•boda! ine grap skima dakaha.
Unon matcha mande ga•akbabebeaha ine chanchienba rang'•san chagrope akkaruko chikkropaha. Akkaru ding•beani gimin matcha ku•Sik gimik kamako man•e mikowel•wele siaha. Indakesa uamang abisa ua walo matchaoni jokaha.
Post a Comment